GRAUTUR

Tæknibrellur

2011-09-22T22:08:00.003Z

Um nokkurra ára skeið hef ég verið haldin prjónaáráttu. Áráttan snýst aðallega um að læra nýjar tæknibrellur og framan af góndi ég gjarnan á youtube þar sem amerískar prjónadívur með mergjaðan hreim sýndu listir sínar. Ég var sérdeilis sólgin í flóknar uppskriftir og snúin verkefni en um leið og ég réð fram úr þeim og náði á þeim tökum þurfti ég að fá eitthvað nýtt að læra.

Um síðustu áramót þótti mér ég eiga orðið heldur mikið af garni. Mér fannst næstum eins og taugakerfið í sjálfri mér væri í beinu sambandi við vaxandi garnbirgðir og því fylgdi stígandi óþol. Ég vil ekki hafa of mikið af dóti í geymslu, það er betra að geyma það úti í búð. Ég ákvað að frá og með ársbyrjun skyldi ég ekki kaupa eina garnhnotu fyrr en gengið hefði á byrgðarnar svo um munaði. Nú er farið að rofa til enda hef ég fundið upp á ýmsum ágætum leiðum til að losa mig við garnið. Raunar hef ég verið svo dugleg að ég ákvað að verðlauna mig í dag með því að fara með garn í poka í Bjarkarás og gefa. Það var gott.

Hér eru örmyndir af peysu sem ég er að prjóna nú um stundir úr færeyskri ull. Uppskriftin er eftir danskan hönnuð sem ég er búin að læra margt af. Bráðum ætla ég að leggja prjónana mína á hilluna og geyma þá þar í svona 20 ár. Það hef ég gert áður og svo undarlegt sem það er þá fer manni fram við það líka.

Borgundarhólmsvasi og munablæti

2011-09-20T21:02:00.009Z

Systir mín dvelur gjarnan á Borgundarhólmi í sumarleyfinu sínu. Þá leigir hún hús í Svaneke, sem er fallegt, lítið þorp á austurhluta eyjunnar. Við heimsóttum hana einu sinni. Það er hverrar krónu virði að fara til Bornholm.

Á eyjunni þverfótar ekki fyrir keramiksverkstæðum.

Um helgar þverfótar ekki fyrir skranmörkuðum. Þar eru einkum og sér í lagi til sölu eldhúsvogir eins og voru til á hverju íslensku heimili í eina tíð; þær voru festar á vegg með skálinni á og svo tók maður skálina út og helli hveitinu í. Ef einhvern langar í þess háttar vog fær hann hana pottþétt á laugardegi á Borgundarhólmi.

Ég keypti mér einn hlut á skranmarkaði í Neksø, og það er þessi keramikvasi:

Ég væri sjálfsagt fyrir löngu búin að losa mig við hann ef ekki væri fyrir það hvar ég keypti hann. Ég segi við sjálfa mig í hvert skipti sem ég handfjatla hann, „Þennan vasa keypti ég á Borgundarhólmi,“ og rifja upp í leiðinni hvað allt er fallegt þar. Um daginn setti ég í vasann falleg og ilmandi sorgarblóm.

Og vegna þess að bróðir minn, sem hélt úti því sem hann kallaði munablætisblogg, hefði fundið út með hraði hvaða frómi keramiker renndi vasann datt mér í hug að bera hveiti á botninn. Þá kom þetta í ljós:

Vasinn er sem sé frá Søholm stentøj á Borgundarhólmi - ég skil ekki fangamarkið og á ekki von á úr þessu að úr því rætist.

Hundahald

2011-09-17T21:05:00.003Z

Það er gaman að koma til Akureyrar. Þar býr til að mynda Nagli, sem þykir gott að fara út að ganga. Nagli er bæði blíður og skapgóður hundur enda vel viðraður. Myndin var tekin 17. júní í vor og þá passaði Hrafn göngugarpur bæði í skóna sína og stakkinn, það gerir hann ekki lengur.

Akureyringar flokka ruslið sitt. Hvenær ætlum við Reykvíkingar að byrja á því?

Lundur

2011-08-24T10:36:00.005Z

Lundur í Svíþjóð er fallegur bær. Götur eru steini lagðar og húsin eru sum hver frá því löngu fyrir daga hallamálsins en svo vel hirt að það mætti halda að viðhald væri bundið í lög með ströngum refsingum ef ekki er farið eftir þeim. Ég hef samt meiri trú á að umhirðan sé þeim í blóð borin.
*Miðbærinn er fyrir gangandi fólk. Bílastæði eru fá og torg eru fyrir fólk og markaði en ekki bifreiðar nema kannski yfir blánóttina eða eftir að vinnudegi er lokið.
*Sorphirða er til fyrirmyndar. Hver blokk eða íbúðakjarni deilir tunnum, sumar eru inni í til þess gerðum húsakynnum en aðrar eru á læstum, afgirtum útisvæðum. Sorp er flokkað í litað gler, glært gler, stífan pappa, dagblöð, blikk, rafhlöður, raftæki ef svo ber undir og loks almennt heimilssorp. Þessu tókst þeim í tæplega 90 þúsund manna bæjarfélagi að hrinda í framkvæmd og það fyrir a.m.k. 20 árum.
*Það þarf enginn að segja mér að Reykvíkingar geti ekki gert þetta líka. Íslendingar bera veðrið fyrir sig sinkt og heilagt en það eru engin rök hér. Eiga þeir ekki flestir úlpu og skó og eru þeir ekki hvort er eð einlægir aðdáendur girðinga sem fást í flekum bæði í Húsasmiðjunni og Byko. Eftir hverju erum við að bíða?

2011-05-28T16:42:00.002Z

Bara gá hvort ég muni aðgangsorðin og hvernig maður ber sig að.

Af nokkrum gráum

2010-04-24T23:36:00.002Z

Nú er yngri drengurinn fermdur og fínn. Ég hefði átt að eignast fleiri krakka, það er svo gaman þegar þeir fermast. Ég lét vera að fara í ondúleringu en vandaði mig við að raða gráu hárunum saman í lokka svo þau féllu í fallegum strípum niður eftir höfðinu á alla kanta. Ég var með ljómandi fallegan og fægðan silfurkross um hálsinn í tilefni dagsins og var auðvitað spurð hvort ég hefði kannski fægt hann sjálf. Þegar ég ætlaði að svara tók ég eftir að spyrjandinn var farinn að telja á mér þau gráu í gríð og erg. Ég svaraði þá í snarhasti að ég hefði reyndar ekki fægt krossinn sjálf en að ég ætti fægilög sem ég notaði stundum því hann kæmi vel að gagni ef maður vildi lýsa á sér hárið!

2010-02-28T23:56:00.002Z

Ferðaðist með flugvél nýlega og ég var þriðja flottust (þessar tvær á undan voru með blásið hár, strípað ljóst og ekki í flíspeysum) í vélinni - samt var ég alls ekki með varalit og augnháralit en þó með nefið fullt af vasilíni (loftið er svo þurrt í flugvélum ef einhver skyldi ekki hafa áttað sig á því) í sjóðheitum útivistarbuxum, gönguskóm og afsakið, flíspeysu, allt í stíl - hárið hvorki litað né blásið en gráröndótt. Ég spyr aftur, hvar eru flottar og veltilhafðar íslenskar konur eiginlega niður komnar. Mig langar að sjá vel klæddar og smekklega snyrtar konur á venjulegum og virkum degi, um helgar, í messu, í Borgarnesi, í rútu, á skútu ... og þær mega gjarnan brosa. Best að byrja, hvar er strauboltinn?

Maður er bara bit

2010-02-16T19:14:00.006Z

Ég má til að leggja nokkur fagleg orð í faglegan belg fyrst fagstjórinn í LHÍ er búinn að hafa fyrir því að brjóta ísinn. Kjólarnir utan á óléttum eurovisionkynnunum voru ljótir, punktur. Og varla fyrirfinnast ljótari sett en settin í ríkissjónvarpinu - jafnvel ekki í bíbísí. Hvaðan kemur til að mynda þetta drasl sem er í hillunum í Kastljósinu. Hefur skúringafólkið ekkert þarfara að gera en þurrka rykið af ósköpunum. Ég spyr. Og herra minn trúr, hvað eru verðirnir á alþingi eiginlega að hugsa að hleypa alþingiskonum í þingsal í öllum þessum ljótu og víðu peysulufsum. Er búið að rækta hverja eina og einustu fagurfræðitaug úr Íslendingum eða hvað? Maður má barasta þakka fyrir jakkafötin og bindið utan á karlpeningnum. Einn þingmaðurinn, því miður kvenkyns, sat í þinginu í dag í vægast sagt skessulegum fötum. Ég varð að líta undan.

Annars fór ég í matvöruverslun um síðustu helgi og gerði mér til dundurs að rannsaka klæðaburð og svip viðskiptavinanna. Ég segi það satt, engum stökk bros og klæðaburðurinn á langflestum var svo ruddalegur að ég missti næstum matarlystina. Það ætti að skylda fólk til að klæða sig upp á áður en það fer að versla í matinn. Nei, kannski ætti einmitt að skylda fólk til að mæta í jogginggalla í matarbúðir, þjóðin myndi þá kannski lafa í kjörþyngd aðeins lengur - ef það er þá ekki orðið of seint.

Er maður eitthvað skárri sjálfur?

Kasmíran

2010-01-28T22:11:00.003Z

Ég fór í dýrindis fataverslun og mátaði bæði buxur og prjónaða flík úr ull og kasmírull. Maður stingur handleggjunum í gegnum tvö göt og þá liggur flíkin fallega yfir herðarnar, veit ekki hvað þetta heitir en af því hún var úr kasmírull ætla ég að kalla hana kasmíru. Buxurnar voru á útsölu og ég ákvað að kaupa mér þær. Þær voru á 60% afslætti, ómótstæðilegar með öllu. Kasmíran var á fullu verði og ég ákvað að athuga ekki einu sinni hvað hún kostaði. Ég ætlaði ekki að fá hana. Ég smeygði mér úr buxunum og sveiflaði mér í kápuna en tók þá eftir því að hún var þrengri en þegar ég fór inn í mátunarkompuna. Ég steingleymdi að fara úr kasmírunni, ég sver það. Mér tókst að bjarga mér fyrir horn enda var ég enn á bak við tjaldið.

Nú ætla ég að ímynda mér að ég hafi verið í víðri kápu og ekki tekið eftir því að hún hafði þrengst. Ég sé sjálfa mig borga fyrir buxurnar og spranga svo út hnakkakerrt og létt á fæti með pokann minn ... allt þar til þjófavörnin byrjar að væla. Skyldi ég komast upp með að segja: „Æ, ég steingleymdi að fara úr kasmírunni, ég hafði ekki hugmynd um að ég væri enn í henni.“

Alveg eins

2010-01-26T23:36:00.001Z

„Quali stivali desidera provare?“
„Hvaða stígvél langar þig að prófa?“
Alveg eins.

2010-01-24T17:55:00.002Z

„Svanir velja sér maka fyrir lífstíð og eru pörin óaðskiljanleg svo lengi sem þau lifa. Þá sjaldan að svanir velja sér nýjan maka er það vegna þess að fyrri makinn drepst. Vísindamenn sem fylgjast með svönum við Slimbridge í Bretlandi voru því hryggir að sjá að steggurinn Sarindi var með nýjan maka þegar hann sneri aftur úr farflugi á dögunum og töldu víst að fyrrverandi spúsa hans, Saruni, væri ekki lengur á lífi.“

„Eftir að horfa aftur á Silfur Egils í gærkvöldi vöknuðu margar spurningar.“

„Ef það sé sól er mamma hlupin út í hurð!“

Gleðilega hátíð

2009-12-24T16:29:00.001Z

2009-12-21T11:30:00.001Z

Nú getum við sent jólakveðjur til ættingja og vina „með auðveldum hætti,“ eða svo segir þulurinn í ríkisútvarpinu.

2009-12-18T14:05:00.003Z

Ég ók næstum undir vörubíl í gær, mér brá svo þegar ég sá hund undir stýri á vörubílnum. Hundurinn stakk höfðinu út um gluggann og skimaði í kringum sig forvitnum augum. Ég forðaði mér hið bráðasta þegar ég áttaði mig á að maður sat undir hundinum.

2009-12-17T15:22:00.002Z

Svona byrjar frétt á Pressunni.is:
„Viðskiptablaðið segir ítarlega og með mögnuðum hætti frá ... “
Í næstu málsgrein stendur skrifað:
„Vitnar blaðið með svofelldum hætti til ...“
Mönnum hættir til með svo mögnuðum hætti að hætt er við að hætta steðji að á hættutímum með svofelldum hætti að allir hætta þá hæst stendur og þá er sjálfhætt.

Örðuleikur

2009-11-27T12:00:00.003Z

Kannast einhver við nafnorðið örðuleikur/örðuleikar.
Hvernig leikur er það?

2009-11-27T11:58:00.000Z

devo-devi-deve-dobbiamo-dovete-devono

2009-10-02T09:33:00.003Z

Ók eftir Sæbrautinni upp úr kl. 16 í gær - forðast alla jafna að aka eftir henni síðdegis því umferðin frá Holtagörðum að Sprengisandi er fjandakornið hreinasta stappa. Mér verður hugsað til Ingibjörns sem fór einhverju sinni til málarstarfa á Raufarhöfn. Þegar hann kom til baka á Kópasker sagði hann: „Umferðin er svo mikil þar að það er traffík!“
Nema hvað, umferðarþunginn var þolanlegur - og kona nokkur ók fram úr mér - og las um leið því hún var með a4 bunka á stýrinu hjá sér.

2009-09-28T09:27:00.001Z

Nú eru góð ráð dýr og ég orðlaus!

2009-09-07T10:28:00.002Z

Sunnudagur: 4 þvottavélar þvegnar. Hefði betur eldað almennilegan mat en ekki ss-pylsur með gömlu remúlaði. Endaði daginn í keng af magaverkjum sem entust mér í 5 klukkustundir. Ég vona bara að ég læri það af þessu að ég borða ekki pylsur framar, hvorki soðnar, kaldar né grillaðar.

Æðiber

2009-09-05T22:08:00.003Z

Við vorum öll með æðiber í rassi í dag nema menntskælingurinn sem kom heim upp úr hádegi dauðþreyttur eftir vökunótt í busaferð. Höfðuð fjölskyldunnar stundar sprunguviðgerðir af kappi - af nógu er af taka - húsið liggur undir skemmdum enda hefur það ekki fengið nokkurt viðhald frá því það var málað í upphafi. Ég greip í verkið með honum á milli þess sem ég klagaði slappan blaðbera, fór í 90 mínútna yogatíma, kláraði ullarteppið sem þið sjáið á myndinni, sauð saman rabarbara- og engifer sultu (tvær krukkur) eftir engri uppskrift (mjög bragðgóð og -sterk), skipti á rúmum og þvoði fimm þvottavélar (2x rúmföt, leikfimiföt, flíspeysa, jakkaföt) auk tveggja X (segi ekki meir) þar af var önnur með sturtu og öllu. Ég gleymi örugglega einhverju. Ég skildi ekkert í því af hverju ég var svona þreytt um kvöldmatarleytið.

2009-09-03T10:38:00.002Z

Mér dettur stundum í hug orðatiltækið Nú eru góð ráð dýr. Ég á ekki krónu, kemur annað veifið upp í hugann líka. Býsna nothæf nú um stundir.

2009-08-24T22:41:00.005Z

Hjólatúr gærdagsins, 12 kílómetrar í svo miklu roki að ég fauk næstum af hnakknum. Vindurinn í fangið drjúgan hluta leiðarinnar - sami spotti að miklu leyti á fótinn, einmitt eins og það á að vera. Hjólaði eftir nýrri leið, upp að Elliðavatni og niður Elliðaárdalinn alveg niður að húsinu með fjólubláa þakinu. Meiri háttar.

2009-08-17T22:14:00.003Z

Hjólatúr dagsins, tæpir 18 kílómetrar, sjá gulu línuna (þetta er ekki útlínuteikning af Bart Simpson). Hraðast fór ég á tæpum 40 km/klst., kannski í kringum 37 km/klst. Þá hjólaði ég niður brekku. Eins lýgilegt og það hljómar, hljóp Bolt á þessum hraða í gær þegar hann sló heimsmetið! Það hlýtur að vera alveg ægilega fyndið að sjá manninn hlaupa, fæturnir á honum eru eins og þeytispaðar.

2009-08-14T13:56:00.002Z

Nú segir af konu sem keypti sér tvo cd diska, báða afbragðsgóða. Af báðum hljómar píanótónlist. Sá fyrri rennur fram úr fingrum kanadíska tónlistarmannsins Gonzales. Um hann má lesa hér: http://en.wikipedia.org/wiki/Gonzales_(musician). Hinn diskurinn er frá Vassilis Tsabropoulos, sem er grískur píanóleikari og tónskáld, http://www.tsabropoulos.gr/.

Óárans ambagan opnar

2009-08-06T11:29:00.005Z

Nú er sem sagt svo komið að tónlistarhús allra landsmanna opnar eftir svo og svo mörg ár. Það er ekki nóg með að óárans hamrahöllinn sé táknmynd um tröllslegt mikilmennskuæði heldur þarf að klína þessari ljótu amgögu framan í andlitið á manni í hvert sinn sem maður fer um nágrennið. Tónlistarhúsið verður opnað og svoleiðis er það þegar dauð hús eiga í hlut. Einhver hefur sem sé fyrir því að opna það.
Ég er líka orðin hundleið á því að allt og ekkert byggir á einhverju í stað þess að vera byggt á því eða byggjast á því. Hvað varð um miðmyndina?

Í birtingu

2009-08-04T10:01:00.001Z

„Maður verður að rækta garðinn sinn,“ sagði Birtingur.

Einbandstreyja

2009-07-30T14:59:00.002Z

Einbandstreyjan er tilbúin og hún stingur ... en meiningin var svo sem aldrei að vera í henni heldur miklu frekar að nota garnafganga úr nýtilorðnum garnhaugnum, lesa og skilja uppskriftina og ráða fram úr verkinu sjálfri mér til skemmtunar og monts að endingu.

Æðiber

2009-07-02T10:41:00.003Z

Nýjasta æðiberið er hjólreiðar. Mig hefur lengi langað að hjóla í vinnuna en vaxið það í augum. Samstarfsmaður minn hjólar flest sem hann fer alla daga ársins sama hvernig viðrar svo mér fannst eins og mér væri lítil vorkunn að hjóla eins og einu sinni í góðu veðri. Alltaf hætti ég við. Svo var það á mánudagskvöldið að ég beit það í mig að daginn eftir færi ég hjólandi til vinnu. Ég skrifaði meira að segja minnismiða á náttborðið mitt í þann mund að ég datt út af: Hjóla til vinnu. Ég varð alveg grautfúl þegar ég sá iðann morguninn eftir. Nú er ég búin að hjóla til vinnu þrjá daga í röð og leggja að baki u.þ.b. 70 kílómetra. Það tekur mig ekki nema helmingi lengri tíma að koma mér í vinnuna en þegar ég fer á bílnum. Áætlað er að næsta haust kosti par af nagladekkjum krónur 14 þúsund.

Viðkvæmni er þetta

2009-06-29T11:59:00.004Z

Mikil ósköp sem það er hægt að vera viðkvæmur. Ég fékk lánaða hjóðbók í vikunni, Þ. Eldjárn les eigin smásögur, Sérðu það sem ég sé. Á þetta hlusta ég í bílnum og geri mér eðlisleiðinlegar bílferðir að tilhlökkun. Það góða við þessar sögur er að þær eru ekki með óvæntum endi í ætt við þættina sem einu sinni voru sýndir í sjónvarpinu. Þvert á móti eru þetta blíðlegustu sögur - en vitanlega er rúsína í þeim. Í gær var komið að sögu um feluleik. Skyndilega fylltist blóðið í mér af streitu og kvíða svo ég þorði ekki annað en mæla í mér blóðsykurinn. Hann var í lagi, jafnvel eilítið of hár ef eitthvað var. Það var bara sagan og lestur skáldsins sem setti mig svona út af laginu að ég trúi því varla enn. Ef ég væri ekki hætt með öllu að nota áfengi hefði ég þurft að fá mér í tána til að róa mig niður. Skáldið á annars merkisafmæli 22. ágúst.

Rakstur undir stýri

2009-06-05T09:57:00.004Z

Um daginn ók ég samsíða konu sem var í óða önn að mála sig og gera sig fína um leið og hún ók á hámarkshraða eftir Sæbrautinni. Í morgun ók ég fram úr karli sem notaði tímann á milli þess sem hann skipti um gír til að raka sig. Hann á sér þær málsbætur að hann ók nokkuð undir hámarkshraða.
Í gær ók ég fram úr manni sem keyrði um göturnar og las um leið af blaði sem hann hafði stillt upp á stýrið.
Ég tek það fram að hingað til hef ég aldrei prjónað undir stýri heldur haft mér til trausts ágætan einkabílstjóra ... en ég ætti kannski að hugleiða það.

Frusu saman

2009-05-10T12:42:00.002Z

Vetur og sumar frusu saman, myndin er tekin kl. 7 að morgni sumardagsins fyrsta.

Það var snyrt sig undir stýri

2009-05-06T11:29:00.004Z

Ég get varla hlustað á útvarpið á meðan ég ek ... bróðir minn getur vitnað um það að ég tala helst ekki heldur undir stýri, ég er bara svo takmörkuð að mér finnst það ærinn starfi að aka í þessari illa hönnuðu, grámóskuborg. Það er því ekki að undra að mér hafi brugðið í brún í gærmorgun þar sem ég þeystist á minni rennireið eftir fjögurra akreina hraðbrautinni út úr úthverfinu mínu. Upp að hægri hliðinni geystist bifreið á fleygiferð, dama á besta aldri undir stýri ... í vinstri lúku hélt hún á dós af kinnalit ... með þeirri hægri hrærði hún í dósinni með stórum bursta og svo bar hún burstann upp að fésinu. Ég segi fyrir mig að mér finnst það býsna vandasamt að bera á mig kinnalit ... reyndar svo að ég þarf að taka tilhlaup að því.

Og fyrst borgina ber á góma má ég til að minnast á þetta forljóta hverfi sem Skeifan og Fenin eru. Kærastinn sýndi mér loftmynd af hverfinu - myndin var við hliðina á annarri loftmynd frá Cincinnati í Bandaríkunum. Undir myndunum var spurt hvor væri frá Reykjavík. Það fór náttúrulega ekkert á milli mála hvor var hvor. Það er eiginlega makalaust hvað þetta er forljótur og ómanneskjulegur blettur ... hann hlýtur að vera einsdæmi í veröldinni ... maður þarf að herða sig upp áður en maður leggur í hann. Var virkilega ekki hægt að hanna svolítil huggulegheit þarna?

2009-03-25T17:59:00.003Z

Með Birtu ... sem kom í heiminn í september. Hún á heima hjá góðu fólk í Kópavoginum og við fórum að heimsækja hana um síðustu helgi.

2009-03-17T10:55:00.003Z

"You are never too old to set another goal or to dream a new dream."
C.S.Lewis

2009-03-11T11:30:00.003Z

Ég sé ekki betur en að krókusarnir séu komnir hálfa leið upp úr moldinni hjá Unni. Unnur er aftur á móti farin. Hún verður til moldar borin í vikunni. Hún var einstök blómarós. Það voru forréttindi að fá að kynnast henni þótt ekki væri nema af því að búa við sömu götu. Hún plantaði krókusum í hjartað í mér.

Langamma átti tölubox

2009-03-05T12:32:00.004Z

Ég á í minni mínu myndir af mér þar sem ég sit á gólfinu hjá langömmu minni, fyrir framan dívaninn hennar. Það stafar meðalalykt frá náttborðinu hennar, ég á náttborðið núna en lyktin er farin. Ég er að leika mér að tölunum hennar, hún á fullt box af þeim.

Ég klippi tölur af flíkum áður en þær fara slitnar og skældar í sorptunnuna ... ef ég klippi þá ekki flíkurnar líka í ræmur og hekla úr þeim mottur undir potta, það gerði ég í fyrsta skipti í gærkvöldi, ef ég nenni tek ég ljósmynd og hendi hér inn - ekki líklegt samt. Mér leggst bara ekki til nógu mikið af tölum. Stundum fer ég í álnavörubúð til að athuga með töluúrvalið en það er sannast sagna fátæklegt að minnsta kosti þar sem ég hef ratað. Svo kosta tölurnar hvítuna úr auganu. Að hugsa sér að ein, smá og venjuleg tala kosti 95 krónur, jafnvel rúmar 100 krónur.

Veit einhver um búð þar sem maður kemst í almennileg tölubox, mig langar nefnilega að safna tölum og eiga fullt box af þeim. Svo kemur að því að ég fer að safna í kringum mig meðalalykt líka þótt ég eigi ekki von á að mér eldist aldur til þess að verða langamma, ekki nema þá í plati.

2009-01-14T10:39:00.001Z

"Do something wonderful: people may imitate it."
Albert Schweitzer, handhafi friðarverðlauna Nóbels árið 1952.

2008-12-11T09:38:00.002Z

Fjarsýni hefur hellst yfir frúna .... það er alveg sprenghlægilegt! Heyrnarleysi hrjáir karlinn, honum heyrðist frúin stæra sig af mikilli bjartsýni þegar hún bar sig upp við hann um fjarsýnina, sem hann hefur reyndar litla sem enga reynslu af þó svo að hann sé áratugnum eldri - hann er heldur ekkert mikið í því að lesa innihaldslýsingar í matarbúðum, telja út lykkjur og spor og þess háttar.

Lítið skylt fjarsýni en í ætt við heyrn: Með þessum hætti er alveg ömurlegur orðaleppur sem tröllríður húsum nú um stundir. Og svo nenni ég ekki að hlusta á það mikið lengur að „allir tóku þátt í þessu,“ - það væri hæpið að segja um fjölskyldu alkóhólistann að hún hefði öll tekið þátt í drykkjunni.

2008-08-11T16:58:00.003Z

Allir kunna að brosa, þó augun felli tár,
allir reyna að græða sín blæðandi sár,
alltaf birtist gleðin þótt eitthvað sé að,
allir þekkja ástina, undarlegt er það.
Maðurinn er steyptur úr misjöfnum málm,
maðurinn á skylt við hinn blaktandi hálm.
Maðurinn er knörr, sem klýfur ölduföll,
kraftur sem rís hátt eins og gnæfandi fjöll.
Maðurinn er vetur með myrkur og tóm,
maðurinn er sumar með geisla og blóm,
maðurinn er ljósbrigði, mikil og tvenn,
maðurinn er tími og eilífð í senn.

Brot eftir Ólínu Andrésdóttur.
Gunnar Stefánsson fjallaði um hana og tvíburasystur hennar Herdísi á Rás 1 á þjóðhátíðardaginn. Sátum í bíl á suðurleið eftir 25 ára júbíleum í MA og vorum komin á fremsta hlunn með að slökkva á tækinu - áttum von á einhverju með þjóðernisívafi ... en reyndin varð heldur betur önnur. Mitt fyrsta verk á virkum degi var að ná mér í ljóðasafn systranna.

2008-08-07T14:55:00.002Z

There is a crack, a crack in everything
That´s how the light gets in.

Spakmæli dagsins eru frá Leonard Cohen.

Datt niður á forvitnilega tónlist, á npr.org: Sara Tavares

2008-08-03T22:12:00.003Z

Við fórum auðvitað á gamla vinnustað bóndans.

Úff .... törn framundan .... þrífa þrífa. Ef að líkum lætur verður ekki auðvelt að hemja sig, hér verður hægt að fremja skurðaðgerð í kvöld án minnstu komplikasjóna.

Mamma mín: Ég sendi þér póst á heimanetfangið þitt, viltu lesa það og svara við fyrsta tækifæri.

Við Kyrrahafið

2008-07-28T16:19:00.000Z

2008-07-15T05:36:00.003Z

Hér, á 18. stræti, örfáum blokkum fyrir ofan Castrohverfið, bjó bóndinn til margra ára og nú er hann búinn að sýna okkur götuna sína, þvottahúsið sitt, sem er búið að vera núna, kaffihúsið sitt, sem enn er á sínum stað en með nýju nafni. Það er búið að mála húsið hans (hm, 22 ár síðan hann flutti heim) - og líma bláan miða í gluggann (Kjósið Cindy á þing) en hommarnir og lesbíurnar eru á sínum stað á horninu á Castro og 18. stræti og þar í kring. Yoe yoe yoe, leikskóli systranna, er á sínum stað, sumt breytist ekkert ... og borgin sjálf er stór þótt hún sé lítil.

2008-07-14T04:40:00.002Z

Norðan megin við Golden Gate brúna.

2008-07-10T23:05:00.004Z

Violetta er spennandi ... en fjarska spennandi eins og stendur.

2008-06-30T09:14:00.001Z

„Það er að vanta sjö iðjuþjálfa.“